Kocha Msaidizi Atua Yanga Sc

Klabu ya Yanga sc imemtambulisha Mustafa Kodro kuwa kocha msaidizi wa klabu hiyo akichukua nafasi ya Mussa Ndaw ambaye ameondolewa sambamba na Kocha Miguel Gamondi kupisha mabadiliko mapya klabuni hapo.

Mustafa ni pendekezo la kocha mkuu Sead Ramovic ambaye wamefanya kazi pamoja katika klabu ya Ts Galaxy inayoshiriki ligi kuu nchini Afrika ya Kusini.

Kocha huyo baada ya kutambulishwa moja kwa moja aliwasili kambini kwa klabu hiyo iliyopo Kigamboni Avic Town na kuanza moja kwa moja kuwanoa mastaa wa timu hiyo waliopo kambini licha ya baadhi ya mastaa kuwa katika majukumu ya timu za Taifa.

Sead na Mustafa wamefanya kazi wote katika klabu ya Ts Galaxy ambapo walitengeneza timu imara inayocheza mchezo mzuri ikijenga mashambulizi kuanzia nyuma huku ikifanikiwa kuwavimbia vigogo Mamelod Sundowns,Kaizer Chiefs na Orlando Pirates katika michezo mbalimbali ya ligi kuu na michuano mingine nchini humo kabla ya mabosi wa klabu hiyo kuamua kuuza mastaa wake wakubwa wakati wa dirisha dogo la usajili mwaka huu.