Moalin Atambulishwa Yanga Sc

Hatimaye Klabu ya Yanga sc imemtambulisha aliyekua kocha wa klabu ya Kmc Abdulhamid Moalin kuwa mkurugenzi wa Ufundi wa Klabu hiyo yenye makao yake makuu mitaa ya Twiga na Jangwani.

Moalin ambaye pia amewahi kuifundisha klabu ya Azam Fc kisha akatimkia Kmc ambapo alijiuzuru siku chache zilizopita huku taarifa zikizagaa kuwa anakwenda Yanga Sc kuwa kocha mkuu.

Hata hivyo klabu hiyo ilimtambulisha Sead Ramovic kuwa kocha mkuu na leo Moalin ametambulishwa kuwa mkurugenzi wa ufundi akiwa na kazi nzito ya kuangalia soka la vijana la klabu hiyo sambamba na mambo yote ya kiufundi ikiwemo kushauri kuhusu usajili wa wachezaji.

Mara ya mwisho nafasi hiyo ya Ufundi klabuni hapo ilishikiliwa na Mwinyi Zahera huku kocha mkuu akiwa ni Nasredine Nabi ambapo moja ya zao la kazi kubwa ya Zahera ni kukuza kipaji cha mshambuliaji Clement Mzize ambaye sasa amegeuka lulu klabuni humo.

Pia katika historia ya klabu hiyo nafasi hiyo pia miaka ya nyuma iliwahi kushikwa na George Lwandamina ambapo baadae alikuwa kocha mkuu wa klabu hiyo baada ya kocha Hans Van De Pluijm kutimuliwa.