Manyama Aitemana na Azam Fc

Klabu ya Azam Fc imeamua kuachana na beki Edward Charles Manyama baada ya mchezaji huyo kumaliza mkataba wake klabuni hapo huku mazungumzo ya mkataba mpya yakishindwa kufikia tamati kwa pande zote mbili.

Tayari mchezaji huyo ameshamalizana na klabu hiyo na sasa anaangalia ofa alizonazo kutoka ndani na nje ya nchi ili kujua atajiunga na timu gani huku klabu ya Al Hilal Fc ikiwa mstari wa mbele zaidi kumnasa kutokana na kumuwekea ofa nono.

Manyama alijiunga na Azam Fc akitokea Namungo Fc ambapo amedumu Chamazi kwa takribani misimu mitatu kutokea msimu wa 2021 ambapo amekua akitumika zaidi kama beki wa kati ama wa pembeni licha ya msimu huu kukosa namba kutokana na kusajiliwa kwa majembe kama Yannick Bangala na Yeisson Fuentes ambao wametawala katika kikosi hicho.

Tayari mabosi wa Azam Fc wameshaanza maboresho ya kikosi hicho baada ya kupata nafasi ya kushiriki michuano ya kimataifa ya klabu bingwa barani Afrika msimu ujao baada ya kumaliza katika nafasi ya pili ya ligi kuu nchini.