Wakati dirisha la usajili likielekea kufungwa hapa nchini usiku wa Januari 15 klabu ya Simba sc iliamua kuachana na washambuliaji wake Moses Phiri na Jean Baleke kutokana na kocha Abdelhack Benchika kutoridhishwa na viwango vyao.
Moses Phiri na klabu ya Simba sc walikubaliana kuachana kutokana na mchezaji huyo kukosa muda zaidi wa kucheza licha ya kwamba ni mfungaji mzuri tu ambapo msimu uliopita kabla ya kukumbwa na majeraha alikua tayari ameshafunga mabao kumi katika ligi kuu nchini.
Mpaka sasa haijafahamika atajiunga na timu gani baada ya kumalizana na Simba sc na kuwa mchezaji huru kujiunga na klabu yeyote huku kukiwa na taarifa kuwa baadhi ya klabu za nchini Zambia zimeanza kuulizia upatikanaji wake.
Kwa upande wa Jean Baleke yeye anarejea klabuni kwake Tp Mazembe kutokana na sababu kuwa alikua Simba sc kwa mkopo wa muda mrefu.
Baleke pamoja na kutemwa alikua na takwimu nzuri akiwa amefunga mabao nane katika michezo 11 ya ligi kuu nchini akiwa nafasi ya tatu katika orodha ya wafungaji huku pia akiisaidia Simba sc kuingia hatua ya makundi ya ligi ya mabingwa barani Afrika.
