Simba Sc Yaituliza Ihefu

Klabu ya Simba sc imeituliza klabu ya Ihefu Fc katika uwanja wa Benjamini Mkapa uliopo katika manispaa ya Temeke baada ya kufanikiwa kuifunga 2-1 katika mchezo wa ligi kuu ya soka ya Nbc inayoendelea hapa nchini.

Simba sc iliyoanza na kikosi chenye mabadiliko machache kutoka kile kilichocheza mechi na Al Ahly nchini Misri ambapo ilianza na mshambuliaji Jean Baleke badala ya John Bocco huku eneo la katikati mwa uwanja akianza Sadio Kanoute badala ya Mzamiru Yassin.

Iliwachukua Simba sc dakika 13 kupata bao la kwanza likifungwa na Jean Baleke baada ya uzembe wa Joseph Mahundi akiwa anarudisha mpira kwa kipa Fikirini Bakari ambao ulimkuta mfungaji.

Dakika ya 25 ya mchezo Ismail Mgunda alimalizia shuti lililotemwa na kipa Ally Salim na kusawazisha bao hilo mpaka kipindi cha kwanza kinamalizika matokeo yalibaki 1-1.

Kuingia kwa Moses Phiri akitoka Baleke kulizaa matunda ambapo dakika ya 65 ya mchezo alifunga bao safi akimalizia pasi ya Luis Miqquisone na kuihakikishia timu yake alama tatu katika mchezo huo.

Mpaka dakika tisini zinamalizika Simba sc ilichukua alama zote tatu na sasa kufikisha alama 18 katika michezo sita ya ligi kuu ikiwa katika nafasi ya pili ya msimamo kwa tofauti ya mabao na Yanga sc ambayo ipo kileleni huku Ihefu Fc kutokana na matokeo hayo sasa inasalia katika nafasi ya 11 ikiwa na alama saba katika michezo saba ya ligi kuu nchini.