Mgunda Apaa Kujiunga As Vita

Aliyekua mshambuliaji wa klabu ya Mashujaa Fc Ismail Mgunda ameondoka nchini leo hii kuelekea nchini DR Congo kujiunga na timu ya As Vita iliyomsajili katika dirisha dogo la usajili mwezi huu.

Mgunda amejiunga na As Vita baada ya kupendekezwa na kocha Yousouph Dabo aliyekua anaifundisha Azam Fc msimu uliopita ambaye aliwaomba mabosi wa klabu ya As Vita kumsajili.

Dili hilo awali lilikwama lakini sasa baada ya makubaliano rasmi kufikiwa staa huyo anaondoka nchini baada ya klabu yake ya Mashujaa Fc kumruhusu baada ya kufanya biashara na As Vita.

Mgunda anasifika kwa kushambulia kwa kasi pamoja na nguvu kubwa ambapo huwapa shida mabeki wa timu pinzani.

Mshambuliaji huyo hii sio mara ya kwanza kucheza nje ya nchi ambapo ameshawahi kuichezea klabu ya Jomo Cosmos ya Afrika ya kusini huku akivichezea vilabu vya Ihefu Fc,Ruvu Shooting,Tanzania Prisons,Coastal Union na Mashujaa Fc.