Meneja habari wa klabu ya Simba Sc Ahmed Ally ametangaza viingilio vya mchezo wa kariakoo Derby baina ya klabu hiyo na Yanga sc utakaofanyika Oktoba 19 2024 katika uwanja wa Benjamin Mkapa jijini Dar es Salaam.
Ahmed amesema kuwa kiingilio cha juu ni shilingi elfu hamsini huku cha chini kikiwa ni shilingi elfu tano kwa jukwaa la mzunguko.
“Tarehe 19 tunaenda kucheza mechi na mkubwa mwenzetu ambae tumepishana mwaka mmoja wa kuzaliwa, hii ni mechi ambayo inabeba taswira ya soka letu la tanzania”.Alisema Ahmed Ally wakati akizungumza na waandishi wa habari.
Viingilio vya Kariakoo Derby kwa mujibu wa klabu ya Simba Sc ambao ndio wenyeji wa mchezo huo ni VIP A: 50,000/=,VIP B: 30,000/=,VIP C: 20,000/=,Jukwaa la machungwa: 10,000/= na Jukwaa la mzunguko ikiwa ni shilingi 5,000/= tu.
Pia Ahmed aliwaomba mashabiki wa klabu hiyo kujitokeza kwa wingi siku ya mchezo huo wakiwa wamevaa jezi za klabu hiyo.
“Tunahitaji wana Simba wote wavae jezi Oktoba 19, tumemuomba mzabuni wetu Sandaland aendelee kutoa punguzo kwenye jezi zetu ili kila mwana simba atakaekuja uwanjani Oktoba 19 aje amevaa jezi Original, maana hiyo jezi zimepunguzwa kwa rejareja zinauzwa Elfu 30.”Alisisitiza Ahmed
Mchezo huo unatarajiwa kuwa mkali na wa kusisimua kutokana na kila timu kuhitaji alama tatu muhimu katika mchezo huo huku Simba sc wakiwa na presha kubwa ya kupata matokeo kutokana na kutoshinda katika michezo mitatu ya karibuni.
