Viungo washambuliaji Leandre Onana na Awesu Awesu wamewasili salama jijini Alexandria nchini Misri kujiunga na kambi ya klabu ya Simba sc kwa ajili ya kuanza mazoezi na kikosi cha timu hiyo kujiandaa na msimu mpya wa ligi kuu na michuano ya kimataifa ambapo Simba sc itashiriki kombe la Shirikisho barani Afrika.
Onana ambaye alijiunga na Simba sc msimu uliopita alikua katika hatihati ya kutemwa na nafasi yake ilitarajiwa itazibwa na Elia Mpanzu ambaye mpaka sasa dili lake kujiunga na klabu hiyo limekua na utata huku ikitarajiwa kutokumalika kabisa kutokana na klabu ya As Vita kufanikiwa kumshawishi mchezaji huyo kusalia nchini Congo na kuwalazimisha mabosi wa Simba sc kumrudisha Onana ambaye alishapata timu nchini Afrika ya kusini.
Kwa upande wa Awesu yeye amejiunga na Simba sc msimu huu akitokea Kmc baada ya kununua mkataba wake uliokua umesalia mwaka mmoja kwa shilingi milioni 50 licha ya klabu ya Kmc kutoridhika na suala hilo ambapo wamekimbilia kushtaki katika kamati ya sheria na hadhi za wachezaji ya Shirikisho la soka nchini (TFF).
Wachezaji hao sasa watapikwa chini ya kocha mpya Fadlu Davis ambaye amejiunga na timu hiyo msimu huu huku akiwa na kazi ngumu ya kuleta muunganiko wa kikosi katika siku zilizobaki kabla ya kurejea nchini kwa ajili ya michuano ya ngao ya jamii kuanzia Augusti 8 watakapocheza na Yanga sc katika hatua ya nusu fainali.
