Kramo Aongeza Mzuka Zanzibar

Kiungo mshambuliaji wa klabu ya Simba sc Aubin Kramo amewasili nchini kutoka nchini kwao Ivory Coast alipokwenda kwa ajili ya matibabu na moja kwa moja amejiunga na kambi ya timu hiyo iliyopo visiwani Zanzibar kwa ajili ya michuano ya kombe la Mapinduzi.

Kramo ambaye alisajiliwa msimu huu wakati wa dirisha kubwa la usajili lakini mpaka sasa hajafanikiwa kuitumikia klabu hiyo kutokana na kusumbuliwa na majeraha ya mara kwa mara kiasi cha kutaka kutemwa wakati huu wa dirisha dogo.

Mara baada ya kurejea, Kramo alisema kilichobaki ni mazoezi madogo kutoka kwa daktari ili kumfanya awe fiti zaidi na atakapoona hali yake imeimarika atarudi uwanjani huku Daktari wa klabu ya Simba sc Edwin Kagabo alisema anasubiri kumuona nyota huyo na kumfanyia vipimo kabla ya kutoa taarifa rasmi.

“Niko sawa ninachosubiri ni ratiba ya daktari wa timu ili kuendelea na mazoezi ya viungo na mepesi, halafu tutajua baada ya Ligi kurejea kama nitakuwa sawa,” alisema Kiungo huyo aliyefanya vizuri na klabu ya Asec Mimosa.

Ingawa kiungo huyo amejiunga na kambi ya timu hiyo visiwani Zanzibar ni ngumu kutumika katika michuano ya kombe la Mapinduzi kutokana na kutokua na utimamu wa mwili wa kutosha.