Gamondi Anataka Majembe Mapya

Taarifa kutoka ndani ya klabu ya Yanga sc zinasema kuwa kocha Miguel Gamondi tayari amewasilisha ripoti kwa viongozi wa klabu hiyo ambapo ameonesha kuwa anahitaji maboresho katika baadhi ya nafasi katika kikosi hicho.

Pamoja na kufanya vizuri katika mechi tisa za kwanza za ligi kuu nchini bado kocha huyo ameainisha baadhi ya maeneo ambayo anahitaji yaboreshwa hasa eneo la kiungo mkabaji,winga na mshambuliaji.

Kwa upande wa kiungo mkabaji yeye anahitajika kuja kusaidiana na Khalid Aucho hasa pindi anapokosekana huku winga anahitajika kuja kuongeza kasi pembeni kusaidiana na Jesus Moloko huku mshambuliaji wa kati anahitajika kuja kuchukua nafasi ya Hafidh Konkoni ambaye ameshindwa kumshawishi kocha huyo.

“Viongozi wangu wanajua tayari kipi kinahitajika kwa ajili ya timu nimewapa nafasi ya kuifanyia kazi lakini tunahitaji watu wa kuja kutuongezea ubora kwenye mechi hizi ngumu,”alisema Gamondi ambaye ndani ya muda mfupi tu falsafa zake zimeanza kutema cheche akiwa na Yanga.

“Unapoingia kwenye maboresho Kuna mambo mengi ya kutakiwa kuzingatia kwanza ni suala la bajeti ya klabu lakini lingine kubwa ni wapi mtapata mtu au watu mnaowahitaji.”Alimalizia kusema Gamondi.

Yanga sc watakua na kibarua kigumu wakianza kampeni ya michuano ya kimataifa ambapo wanatarajia kuanzia ugenini dhidi ya Cr Belouzdad ya nchini Algeria mchezo utakaofanyika Novemba 24.