Gamondi Aandaa Mitego ya Derby

Kocha Mkuu wa klabu ya Yanga, Miguel Gamondi amesema licha ya kuwepo kwa mapumziko ya wiki mbili kupisha michezo ya timu za Taifa kambini kwake hakuna mapumziko bali anatumia muda huo kutengeneza mitego kuelekea mchezo wa dabi dhidi ya Simba utakaofanyika nchini Oktoba 19 2024.

Gamondi amesema hayo leo katika kambi ya timu hiyo iliyopo maeneo ya Avic Town Gomvi Kigamboni jijini Dar es Salaam ikiwa ni siku maalumu ya klabu hiyo kukutana na vyombo mbalimbali vya habari (Media day).

“Hiki ni kipindi cha mapumziko ya wiki mbili ambazo natumia kwa ajili ya kuwasoma wapinzani wetu tunatarajia kukutana nao Oktoba 19, malengo yetu ni kushinda. Tunafahamu wapinzani wetu wako vizuri pamoja na benchi la ufundi”.Alisema Gamondi mbele ya waandishi wa habari.

“Haitakuwa mechi rahisi kwa kuwa mechi iliyopita walipoteza, hawatakuja kama ilivyokuwa mara ya kwanza nimezungumza na wachezaji wangu kujiandaa kwa ajili ya mchezo ujao”.Alimalizia kusema kocha huyo raia wa Argentina.

Gamondi ameingia katika vitabu vya historia ya soka nchini baada ya kuiongoza klabu hiyo kufunga mabao 5-1 dhidi ya Simba Sc akilipa kisasi cha klabu yake kufungwa idadi hiyo ya mabao mwaka 2012.