Waaraba wa Yanga sc Wawasili

Timu ya Club Africains ya nchini Tunisia tayari imewasili nchini kuelekea katika mchezo wa raundi ya kwanza ya hatua ya pili ya mtoano ya kombe la shirikisho dhidi ya Yanga sc utakaofanyika siku ya Alhamis Novemba 2 katika uwanja wa Benjamini Mkapa jijini Dar es salaam.

Klabu Africains imeingia hatua ya pili ya mtoano baada ya kuifunga timu ya Kipanga Fc kutoka Zanzibar kwa jumla ya mabao 7-0 huku Yanga sc ikiingia katika hatua ya mtoano ya kombe la shirikisho baada ya kutolewa na Al Hilal Fc katika michuano ya klabu bingwa kwa jumla ya mabao 2-1 na kuangukia katika michuano ya kombe la shirikisho kwa mujibu wa kanuni za Caf.

Yanga sc italazimika kujipanga ili kuondoka na alama tatu muhimu katika mchezo wa awali siku ya Alhamis ili wakienda nchini Tunisia wawe na kazi rahisi ya kulinda ushindi huo maana Club Africains ni hatari wanapokua nyumbani.

“Ligi ya Mabingwa Afrika tulishindwa kufanya vizuri kwa kukosa matokeo bora nyumbani safari hii tumejipanga kupata Matokeo bora mchezo huu wa kwanza ili kujihakikishia nafasi ya kumaliza kazi ugenini”Alisema kocha wa Yanga sc Nasredine Mohamed Nabi akiuelezea mchezo huo unaosubiriwa kwa hamu na wadau wa soka nchini.