Tambwe Aikomalia Singida FG

Mshambuliaji wa zamani wa klabu ya Yanga sc Amis Tambwe amewapa siku saba klabu ya Singida Fountain Gate kuhakikisha wamemlipa fedha zake za usajili na zingine ambazo anaidai klabu hiyo na wakishindwa basi atakwenda kushtaki katika shirikisho la soka duniani (Fifa).

Tambwe anadai kuwa klabu hiyo imemvunjia mkataba kinyume na utaratibu huku akiwadai baadhi ya madeni katika fedha zake za usajili pamoja na baadhi ya mishahara katika huku pia akibainisha kuwa ana mkataba wa mwaka mmoja uliobaki na klabu hiyo.

“Bado nina mkataba wa mwaka mmoja na Singida, ila wamenisitishia bila ya mazungumzo na cha kushangaza nalipwa mshahara wangu kila mwezi, lakini madai yangu ya fedha za usajili hayafanyiwi kazi”.Alisema Tambwe ambaye anasifika kwa upachikaji mabao.

“Nimeongea na Mwanasheria wangu ameniambia tayari amewatumia barua kuwaamuru wanilipe fedha yangu ndani ya siku saba tangu aitume barua hiyo na kama watashindwa kufanya hivyo mpango wangu ni kwenda FIFA kudai stahiki zangu”.

Mchezaji huy0 alishiriki kwa kiwango kikubwa kuipandisha daraja timu hiyo kipindi ilipokua inaitwa DTB kabla ya kubadili jina kuwa Singida Big Stars na sasa inaitwa Singida Fountain Gate Fc.