Simba sc Yalala kwa Berkane

Klabu ya Simba sc imepoteza mchezo wa hatua ya makundi ya kombe la shirikisho barani Afrika baada ya kukubali kipigo cha mabao 2-0 dhidi ya Rs Berkane katika mchezo uliofanyika katika uwanja wa Manispaa ya mji wa Berkane.

Katika mchezo huo wa kundi D Simba sc iliingia na mkakati wa kuzuia zaidi huku ikiwaanzisha mabeki watatu,viungo wanne na washambuliaji watatu wakiongozwa na John Bocco ambapo mpango huo haukuzaa matunda na mpaka mapumziko Simba sc ilikua nyuma kwa mabao 2 yaliyofungwa na Adama Ba dakika ya 32 na Chark el Bahri dakika ya 41.

Licha ya juhudi za Simba sc kusawazisha lakini mpaka dakika 90 zinaisha matokeo yalibaki 2-0 huku timu hiyo ikishindwa kupiga shuti lililolenga lango katika dakika zote 90 za mchezo.

Simba sc imeshushwa mpaka nafasi ya pili ya msimamo wa kundi D ikiwa na alama 4 katika michezo mitatu huku Berkane wakiwa kileleni na alama 6 na timu hizo zinatarajiwa kuvaana jijini Dar es salaam machi 13.