Kagere wa Motoo,Wabrazil hawapoi

Tamasha la Simba day limefikia kileleni hapo jana kwa mchezo baina ya timu hiyo dhidi ya Power dynamos ya Zambia katika uwanja wa taifa jijini Dar es salaam na Simba iliibuka kwa ushindi mnono wa mabao matatu yakifungwa na Meddie Kagere.

Katika mchezo huo maalumu wa utambulisho wa wachezaji kivutio kikubwa kilikua ni Afisa habari wa timu hiyo Haji Manara wakati akitambulisha mastaa wa timu hiyo hasa akimtambulisha Ibrahimu Ajibu na Cletous Chama huku Meddie Kagere akionyesha jinsi anavyopendwa na mashabiki wa timu hiyo.

Iliwachukua Simba dakika tatu kupata goli la mapema kufuatia uzembe wa kipa wa power dynamos kushindwa kuondosha pasi aliyorudishiwa na beki wake na kumpa nafasi kagere kuandika bao la kwanza.

Kagere aliyesajiliwa kutoka Gormahia ya nchini Kenya alifunga bao la pili dakika ya 58 baada ya kupokea krosi kutoka kwa Deo Kanda kabla ya kuongeza jingine dakika ya 72 akimalizia kona iliyoshindwa kuokolewa na mabeki wa Dynamos ambao walipata goli dakika kadhaa baada ya simba kupata goli la kwanza.

Simba wanajiandaa kwenda nchini Msumbiji kuwavaa Ud Songo katika mchezo wa klabu bingwa barani Afrika raundi ya kwanza kabla ya marudiano kufanyika nchini baada ya wiki mbili.