Edna Lema arejeshwa Yanga Princess

Kocha msaidizi wa timu za Taifa za wanawake Edna Lema(Mourinho) amerejeshwa tena kwenye kikosi cha wanawake cha Yanga Princess baada ya kukikacha kikosi hicho mwezi Juni mwaka huu kufuatia kupishana kwenye masuala mazima ya maslahi.

Edna aliiongoza Yanga Princess kumaliza nafasi ya pili kwenye ligi kuu ya wanawake Serengeti women league,na aliitoa timu hiyo chini kabisa na kuifanya kuwa moja ya timu tishio za wanawake.

Msimu uliopita ilibaki kidogo aipe ubingwe timu hiyo kabla ya Simba Queens kuibuka dakika za mwisho na kulitwaa taji hilo la wanawake,kwenye moja kati msimu bora kabisa na kusisimua kwenye historia ya soka la wanawake nchini.

Baada ya kuondoka Yanga Princess wadau wengi wa soka walishangazwa na uamuzi wa klabu hiyo kuachana na kocha huyo mwenye uwezo mkubwa wa kufundisha soka kutokana na alikowafikisha,hali iliyopelekea kuanza kuhusishwa na kujiunga na wapinzani wao ambao kocha wake mkuu Musa Mgosi alibadilishiwa majukumu na kupewa timu ya vijana.

Juhudi za kumrudisha kocha huyo zimefanywa na wadhamini  wa klabu hiyo GSM ili kuhakikisha Yanga Princess inaendelea kupiga hatua na hatimaye kuutwaa ubingwa wa ligi hiyo ya wanawake,ambayo msimu mpya unakaribia kuanza.