PSG Kuugawa Ubingwa

Baada ya PSG kutangazwa kuwa ni mabingwa wa ligi kuu Ufaransa ‘Ligue 1’na  kufahamika kuwa ligi hiyo haiwezi kuendelea tena kwa msimu huu, beki ambaye pia ni nahodha wa timu hiyo, Thiago Silva ameugawa ubingwa huo kwa madaktari dunia nzima.

Kutokana na madhara ya virusi vya Corona ambavyo vimeenea dunia nzima ,Ufaransa wao wametangaza kuwa ligi hiyo imefutwa kwa kuwa serikali ya nchi hiyo imesema kuwa michezo itaruhusiwa kuendelea mwezi Septemba mwaka huu.

Beki huyo amesema kuwa ubingwa huo ni kwa ajili ya madaktari wote ambao wanapambana na virusi vya Corona duniani kote kwa kuwa wanafanya kazi ngumu sana na hatari.

“Hakika nisingeweza kufika hapa kama siyo sapoti ya familia lakini hakika ubingwa huu ni maalum kwa ajili ya madaktari wote duniani ambao wanapambana na virusi vya Corona,” aliandika beki huyo raia wa Brazil katika akaunti yake ya Instagram.

Silva aliongeza kwa kumshukuru Mungu kwa kutwaa ubingwa wa saba katika miaka nane aliyokaa Ligue 1.