Nigeria Yatinga Fainali Afcon 2023

Timu ya Taifa ya Nigeria imefanikiwa kutinga hatua ya fainali ya michuano ya mataifa ya Afrika yanayoendelea nchini Ivory Coast baada ya kuibuka na ushindi wa 4-2 kwa penati baada ya sare ya 1-1 katika dakika 120 za kawaida.

Nigeria licha ya kumiliki mchezo huo iliwalazimu kusubiri mpaka dakika ya 67 ya mchezo kupata bao la kwanza lililofungwa na William Trost-Ekong kwa penati baada ya Victor Osimhen kuangushwa ndani ya eneo la hatari alipokua akiwatoka walinzi wa Afrika Kusini na ndipo Trost-Ekong alipofunga bao hilo kwa mkwaju mkali.

Wengi wakiamini kuwa mchezo huo umekwisha msaada wa VAR uliwaokoa Afrika Kusini kutoka kufungwa bao la pili na mwamuzi kuwapa tuta ambapo ilionekana kuwa beki wa Nigeria alicheza faulo kabla ya bao hilo na penati hiyo ilifungwa na Teboho Mokoena dakika ya 90 ya mchezo.

Baada ya dakika hizo 90 mwamuzi aliongeza dakika 30 ambapo ambapo ilishuhudiwa Grant Kekana wa Afrika ya kusini akionyeshwa kadi nyekundu dakika ya 115 na baada ya dakika hizo kuisha mwamuzi aliamuru changamoto ya mikwaju ya penati.

Kipa wa timu ya Taifa ya Nigeria Stanley Nwabali aliibuka shujaa akiokoa penati mbili na mwisho kuihakikishia Nigeria kuingia fainali ya michuano hiyo mikubwa barani Afrika kwa ngazi ya timu za Taifa.