Kampuni maarufu ya usimamizi wa ngumi nchini ya Mafia Boxing imeandaa mapambano maalumu ya kufunga mwaka yatakayofanyika siku ya Disemba 26b katika ukumbi wa Superdome Masaki jijini Dar es Salaam.
Katika mapambano hayo 13 yatakayofanyika siku hiyo kutakua na mabondia kutoka mataifa mbalimbali ambapo jumla ya mikanda mitano itawaniwa.
Mastaa wa filamu nchini, Wema Sepetu, Chuchu Hans, Shamsa Ford, Halima Yahaya ‘Davina’ na Aggy Simba wameungana pamoja kupamba ujio wa usiku huo uliopewa jina la “Knockout ya Mama”.
Jimmy Mafufu, Msemaji wa Mafia Boxing Promotion amesema, kwa mara ya kwanza katika taifa kutakuwa na mkanda wa ‘WBO’ ( World Boxing Organization ) kwa bondia wa kike.
“Hii haijawahi kutokea tangu nchi iundwe, na lengo la pambano hilo ni kufanya uchechemuzi wa mchezo wa ngumi kwa Wanawake,” amesema Mafufu.
Mafia Boxing imekua ni kampuni ambayo kwa sasa inakua na inafanya vizuri nchini katika kusimamia mabondia sambamba na kuandaa mapambano ya kimataifa.
